Myanmar Times က ပြည်တွင်းသတင်း တစ်ပုဒ်ပါ အဲ့လိုသတင်းတွေ ဖတ်ခွင့်ရလို့ Myanmar Times မိသားစုဝင်တွေကို ကျေးဇူးအထူးတင်ပါတယ်။
အာဇာနည်ခေါင်းဆောင်ကြီးများအား လွမ်းသူ့ပန်းခွေချ
ဗိုလ်ချုပ်အောင်ဆန်းနှင့် အာဇာနည်ခေါင်းဆောင်ကြီးများအား ကျန်ရစ်သူဆွေမျိုးများနှင့် ပြည်သူများလွမ်းသူ့ပန်းခွေချ ဂါရ၀ပြု
ရွှေယင်းမာဦးနှင့် ကိုကိုကြီး
အတွဲ ၂၇ ၊ အမှတ် ၅၂၇ ( ၂၂ - ၂၈ ၊ ၇ ၊ ၂၀၁၁)
(၆၄)နှစ်မြောက် အာဇာနည်နေ့ ဖြစ်သည့်ဇူလိုင်လ ၁၉ ရက်နေ့တွင် ကျဆုံး လေပြီးသော ဗိုလ်ချုပ်အောင်ဆန်းနှင့် တကွ အာဇာနည် ခေါင်းဆောင်ကြီးများ၏ ကျန်ရစ်သူဆွေမျိုးများသည် အာဇာနည်ဗိမာန်၌ လွမ်းသူ့ပန်းခွေ ချခြင်း၊ ဂါရ၀ပြုခြင်းနှင့် မေတ္တာပို့အမျှ ဝေခြင်းများ ပြုခဲ့သည်။အတွဲ ၂၇ ၊ အမှတ် ၅၂၇ ( ၂၂ - ၂၈ ၊ ၇ ၊ ၂၀၁၁)
ဒေါ်အောင်ဆန်းစုကြည်လွမ်းသူ့ပန်းခြင်း ချရန် ရောက်ရှိလာစဉ်။
ဓာတ်ပုံ-ရွှေယင်းမာဦး
ဦးအောင်ဆန်းဦးနှင့်ဇနီး ဂါရ၀ပြုနေစဉ်။
ဓာတ်ပုံ-ရွှေယင်းမာဦး
ရန်ကုန်မြို့တော်ဝန်ဦးလှမြင့် လွမ်းသူ့ပန်းခွေ ချနေစဉ်။
ဓာတ်ပုံ-ရွှေယင်းမာဦး
သခင်မြမိသားစု လွမ်းသူ့ပန်းခွေချရန်ရောက် ရှိလာစဉ်။ ဓာတ်ပုံ-ရွှေယင်းမာဦး
ထို့နေ့ နံနက် ၈ နာရီတွင် ဂုဏ်ပြု တပ်ဖွဲ့ဝင်များက သေနတ်မြှောက် အလေးပြုခြင်း၊ စစ်ခရာအဖွဲ့က ကျဆုံး ရဲဘော် အလေးပြု ခရာမှုတ်ခြင်းတို့ကို အခမ်းအနားဖြင့် ပြုလုပ်သကဲ့သို့ ရန်ကုန် မြို့တော်ဝန်ဦးလှမြင့် တက်ရောက်ကာ လွမ်းသူ့ပန်းခွေချ အလေးပြု ခဲ့သည်။
ထို့ပြင် အစိုးရမဟုတ်သော အဖွဲ့ အစည်းများမှ ကိုယ်စားလှယ်များလည်း ကျဆုံး လေပြီးသော အာဇာနည်များအား လွမ်းသူ့ပန်းခွေချ အလေးပြုကြသည်။
ဂုဏ်ပြုတပ်ဖွဲ့ဝင်တစ်ဦး ခရာမှုတ်အလေးပြု နေစဉ်။ ဓာတ်ပုံ-အေအက်ဖ်ပီ
၂၀၁၀ ပြည့်နှစ် အာဇာနည်နေ့အခမ်းအနား၌ နိုင်ငံရေးပါတီများအား တက်ရောက်ခွင့်ပြု ခဲ့သော်လည်း ယခုနှစ်တွင်မူ အများ ပြည်သူများ နည်းတူသာ တက်ရောက်ရန် ခွင့်ပြု ခဲ့သည်။
"အာဇာနည်နေ့ဆိုတာ ဖိတ်မှ သွားတက်ရမယ့်ကိစ္စမျိုး မဟုတ်ဘူး။ ဖိတ်ဖိတ် မဖိတ်ဖိတ် ဒီနေ့ဒီအချိန်မျိုးမှာ ဂါရ၀ပြုရမယ်။ အလေးပြု ရမယ်။ ဖိတ်တာ၊ မဖိတ်တာထက် အာဇာနည်ခေါင်းဆောင်ကြီးတွေကို အလေးပြုဖို့က အဓိကပဲ"ဟု တိုင်းရင်းသား စည်းလုံးညီညွတ် ရေးပါတီ မှ ဦးဟန်ရွှေက ပြောသည်။
ဇူလိုင်လ ၁၉ ရက်၊ အာဇာနည်နေ့က ရန်ကုန်တိုင်းဒေသကြီး၊ ဗဟန်းမြို့နယ်ရှိ ဗိုလ်ချုပ်အောင်ဆန်းပြတိုက်သို့ လာရောက် လေ့လာကြသူများအား တွေ့ရစဉ်။ ပြတိုက်ကို နံနက် ၈ နာရီမှ ညနေ ၄ နာရီ အထိ ဖွင့်လှစ်ပြသခဲ့ရာ လူငယ်များနှင့် ပြည်သူ လူထု စုစုပေါင်းတစ်သိန်းခန့် လာရောက်လေ့လာကြသည်။
ဓာတ်ပုံ-ကောင်းထက်
ရှမ်းတိုင်းရင်းသားများ ဖွံ့ဖြိုးတိုးတက် ရေးပါတီမှ ဘဏ္ဍာရေးမှူး ဦးစောသန်းမြင့် က "ပါတီကို အထွေအထူး ဖိတ်ကြားထားတာလည်း မရှိဘူး။ ရန်ကုန်မှာလည်း ပါတီအဖွဲ့ဝင် ဆိုလို့ ကျွန်တော် တစ်ယောက်ပဲ ရှိတော့ အာဇာနည်ကုန်း သွားပြီး မတက်ရောက် နိုင်ခဲ့ဘူး" ဟု ပြောသည်။
