မနေ့ညထဲကလူကနှုံးပြီး နေလို့မကောင်းတော့ အစောကြီးအိပ်ပျော်သွားရော နေ့လည်ကအဖေနဲ့အပြင်သွားတော့ အပူရှပ်ပြီးပြန်လာတော့ ရေခဲရေသောက်လို့ပဲတွေးမိလိုက်တာ

ညလည်ကျတော့ ညာဘက်မျက်နှာတစ်ခြမ်းလုံး အထိမခံဘဲ ရေတောင်မျိုမချနိုင်ဘူး ထမင်းမစားရသေးတော့ ဗိုက်ဆာနေပေမယ့်ရေနှစ်ခွက်ပဲဆင့်သောက်လိုက်တယ် ၁နာရီမီးလာတော့ထမင်းစားပွဲထသိမ်းပြီးတော့ အပေါ်ကန်တောင်ရေမဖြည့်နိုင်ပဲ ပြန်အိပ်လိုက်တယ်

ဒီအိမ်ရောက်ထဲက ခြံထဲဆင်းပြီး နေပူကြီးထဲမှာရေသုံးတာတွေ ညဘက်ကြီးမှခေါင်းလျှော်ရေချိုးတာတွေ ရေခဲရေနေ့တိုင်းသောက်ဖြစ်တာတွေစုဖြစ်သွားတာပါ

နေမကောင်းရင် သြဘာအိမ်မှာတနေ့လုံးအိပ်ဖြစ်ပေမယ့် ဒီအိမ်မှာက မနက်၇နာရီဆိုရင်နိုးရတာပါပဲ မနက်၅နာရီမျက်လုံးပွင့်ကြတဲ့လူတွေကြားမှာ ၇နာရီဆိုတောင်အတော်နောက်ကျနေပါပြီ

လူကထပြီးအိမ်အလုပ်တွေကူနေပေမယ့် ယိုင်နဲ့နဲ့ဖြစ်နေရတာ ဒေါ်ချစ်၉လုံး စီဗစ်၂လုံး အိုမီဆင်း၁လုံး သောက်ထားပေမယ့် နာနေတာလျော့သွားပေမယ့် အစားစားရင်မခံနိုင်သေးဘူး ဆေးခန်းပြဖို့ကလည်းကိုယ်အသားမကျသေးတဲ့ အရပ်ဒေသဖြစ်နေတော့မပြဖြစ်ပြန်ဘူး မမကပုရွက်ဆိတ်လိုတကုပ်ကုပ်လုပ်နေတော့ ကျွန်တော်လည်းမနေသာတော့ ကူလုပ်ပေးနေရရော

ညဘက်ကို ကန်သာယာမှာ အိမ်အတွက်လိုအပ်တဲ့ပစ္စည်းတွေ ညီမနှစ်ယောက်သွားဝယ်ဖြစ်ရော အသွားက၂မှတ်တိုင်ကျော်လမ်းလျှောက်တာအေးဆေးပါပဲ အပြန်ဆိုက်တွဲစီးပြန်မှ မိုးရွာထားတဲ့အရှိန်နဲ့လေအေးမိပြီး မျက်နှာတခြမ်းပြန်ကိုင်လာပါလေရော အသက်ရလာတော့ အရင်လိုပေပေတေတေနေလို့မရတာကို သတိမူမိပါတယ်

ည၉နာရီမီးလာပြန်တော့ အပေါ်ကန်ရေဖြည့် ခေါင်မိုးထပ်တင်မယ့် ဆပ်ပြာတိုင်ကီတွေအသန့်ပြန်ဆေးတာနဲ့တင် လူကဖျားလာပါလေရော အမေကတော့မလုပ်နဲ့ပြောရှာပါတယ် ကျွန်တော်မလုပ်ရင် လုပ်ပေးမယ့်သူက မမ၊ဦးလေးအငယ်နဲ့အဖေပဲရှိလေဗျာ

နေမကောင်းတော့ လွမ်းမိပြန်ပါတယ် ဂရုစိုက်ပါ သက်သာရဲ့လားဆိုတဲ့စကားကို ပြောမှာမဟုတ်ပေမယ့် ဒီအတိုင်းလေးပဲလွမ်းမိတာပါဗျာ

ဒီအိမ်ရောက်တာ ၈ရက်ပြည့်ပြီဆိုတော့ အသားကျပြီလားမေးရင် အသားမကျသေးပါဘူး ဒါပေမယ့်မြေကြီးပေါ်နေရတဲ့အတွက် စိတ်ချမ်းသာရပါတယ် အပင်တွေစိုက်လို့ရတယ် လသာရင်ကောင်းကင်ကြီးကို အားရပါးရကြည့်ပြီး အတွေးတွေရွက်လွှင့်လို့ရတယ်

တကယ်လို့ လက်ထဲပိုက်ဆံလေးစုမိဆောင်းမိတာဖြစ်ဖြစ် ထီလေးပေါက်တာဖြစ်ဖြစ် အပေါ်ထပ်ကိုထပ်တက်ပေးလိုက်ရင် ဦးလေးအငယ်ရော အဖေတို့အမေတို့ရော ပိုပြီးကျယ်ကျယ်ဝန်းဝန်းနေလို့ရသွားမှာပါ

သာမန်လူတစ်ယောက်အတွက်တော့ ပျော်ရမှာရော တော်ရာမှာရော နေရမှာပါပဲဗျာ အရင်ထက်ပိုပြီးနိမ့်ပါးသွားတဲ့အချိန်မှာ လောဘသက်ကာရတွေ ပိုပြီးလျော့နည်းသွားတာက မင်္ဂလာတစ်ပါးပါပဲဗျာ။